O‘zbekiston davlat xoreografiya akademiyasi o‘qituvchilari I.R.Sultangirova, A.I.Yeshimbetova va E.A.Kari-Yakubova 2026-yil 9–19-mart kunlari Qozog‘iston Respublikasi, Olmaota shahrida joylashgan Qozog‘iston milliy ayollar pedagogika universitetida (QYZPU) xalqaro hamkorlik Memorandumi (2023-yil 17-aprel) doirasida malaka oshirish amaliyotini muvaffaqiyatli o‘tab qaytdilar.
Amaliyot dasturi ilk kunlardanoq keng qamrovli kasbiy tajriba almashuv platformasi sifatida yo‘lga qo‘yildi. Xoreografiya kafedrasi professor-o‘qituvchilari bilan o‘tkazilgan uchrashuvlarda ish rejasi batafsil kelishib olindi, hamkorlikning asosiy yo‘nalishlari hamda xoreografik ta’limni rivojlantirishga oid dolzarb masalalar muhokama qilindi.
Ta’lim jarayonini o‘rganishga alohida e’tibor qaratildi: o‘qituvchilar qozoq xalq-sahna va klassik raqs darslarida ishtirok etib, milliy raqsni o‘qitish metodikasi, sahnalashtirish jarayonining o‘ziga xos jihatlari hamda bo‘lajak mutaxassislarni tayyorlash masalalari yuzasidan fikr almashdilar.
Shuningdek, universitetning zamonaviy moddiy-texnik bazasi bilan tanishuv amalga oshirildi: o‘quv xonalari interaktiv oynalar va ixtisoslashtirilgan jihozlar bilan ta’minlangan bo‘lib, bu kasbiy fanlarni yuqori darajada o‘qitish imkonini beradi.
Amaliyot dasturi doirasida musiqa bo‘limi o‘qituvchilari, konsertmeysterlar va talabalar bilan faol kasbiy muloqotlar tashkil etildi. Uchrashuvlar ijodiy va konstruktiv ruhda o‘tib, o‘zaro tajriba almashish va hamkorlik aloqalarini mustahkamlashga xizmat qildi.
Akademik mobillik yo‘nalishida ham muhim uchrashuvlar o‘tkazildi: talabalar bilan, jumladan almashinuv dasturida tahsil olayotgan ishtirokchilar bilan ta’lim sharoitlari, yashash sharoitlari hamda kelgusidagi hamkorlik istiqbollari muhokama qilindi.
Dastur doirasida ilmiy tadbirlar alohida o‘rin egalladi. “Xoreografiya san’atini ilmiy o‘rganish: milliy balet, tarixiy rivojlanish va tadqiqot metodikasi” mavzusidagi Xalqaro ilmiy seminarda I.R.Sultangirova va E.A.Kari-Yakubova o‘z dissertatsiya ishlari natijalarini taqdim etdilar. Ularning chiqishlari mutaxassislar tomonidan katta qiziqish va ilmiy muhokamaga sabab bo‘ldi.
Shuningdek, o‘qituvchilar Qozog‘iston Respublikasidagi oliy ta’lim muassasalari talabalari uchun tashkil etilgan XVIII Olimpiadada ishtirok etib, ilg‘or o‘qitish uslublari hamda talabalar tomonidan taqdim etilgan amaliy va ilmiy ishlanmalar bilan tanishdilar.
Amaliyotning madaniy dasturi doirasida Abay nomidagi Davlat akademik opera va balet teatriga tashrif amalga oshirildi. Unda “Shopeniana”, “Baxni kashf etib” va “Bolero” balet spektakllari tomosha qilindi, bu esa kasbiy va badiiy tajriba almashinuvining muhim qismi bo‘ldi.
Amaliyot yakunlari bo‘yicha o‘tkazilgan davra suhbatida universitet rahbariyati hamda Olmaota, Ostona, Chimkent va Taraz shaharlaridan kelgan ta’lim muassasalari vakillari ishtirok etdilar. Unda kelgusidagi hamkorlik yo‘nalishlari, akademik mobillikni rivojlantirish, qo‘shma loyihalarni amalga oshirish hamda ilmiy aloqalarni kengaytirish masalalari muhokama qilindi.
Joriy yilning 8-aprel kuni O‘zbekiston davlat xoreografiya akademiyasida professor-o‘qituvchilar yig‘ilishida amaliyot natijalari tinglandi. Taqdim etilgan hisobot yuqori baholanib, xalqaro hamkorlikning ta’lim sifatini oshirish va xoreografiya san’atini rivojlantirishdagi muhim ahamiyati yana bir bor tasdiqlandi.
Xalqaro hamkorlikni kengaytirish va ilg‘or tajribalarni joriy etish yo‘lidagi izchil ishlar davom etmoqda.
